Подобрување на амбиентот за водење бизнис, привлекување повеќе домашни и странски инвестиции и развој на туризмот, се приоритети на министерот за економија Беким Незири.
Како што посочува Незири во интервјуто за МИА, активностите ќе му бидат насочени и кон зголемување на вработеноста преку отворање нови работни места, зголемување на инвестициите во енергетскиот сектор со цел намалување на зависноста од увоз на електрична енергија, инвестиции во рудниците и во сите сегменти кои се во надлежност на ресорот економија.
„Мерките кои ќе ги спроведувам се насочени кон подобрување на бизнис климата и зголемување на конкурентноста на националната економија, преку зголемување на конкурентноста кај малите и средните претпријатија, како двигатели на развојот. Во овие мерки ќе се инкорпорират и најдобрите искуства на многу европски земји и препораките на Светската банка и меѓународните финансиски институции, вели Незири.
Во интервјуто министерот Незири говори и за туризмот, рударството, субвенциите за инсталирање сончеви колектори, подобрувањето на конкурентноста на домашните компании, воведувањето на ХАЛАЛ стандардот, трговската размена со Косово,…
