Долготрајните напори на Грција своите финансии да ги доведе во ред би можеле да послужат како модел за Аргентина која неодамна банкротираше втор пат во последните 13 години, изјави вчера новоизбраниот претседател на Европската комисија Жан Клод Јункер.
Посетата на Атина е првата официјална посета на Јункер откако тој ја презема оваа функција.
По разговорот со грчкиот премиер Андонис Самарас, Јункер ги пофали напорите на Грција за балансирање на јавните финансии, посочувајќи дека Аргентина треба да го стори истото.
Грција наскоро би требало да се извлече од шестгодишната рецесија. Пред четири години, откако се најде на работ на банкрот, Атина доби меѓународна финансиска помош, во чија замена се согласи со строги мерки за штедење, вклучувајќи намалувања на јавната потрошувачка, раст на даноците и економски реформи.