Како последица од економските санкции кои ЕУ ги презема против Русија, во Чешка би можело да бидат загрозени 700-1000 работни места, изјави министерот за индустрија и трговија, Јан Младек за чешката државна телевизија ЧТ.
Младек повтори дека во основа анти-руските санкции нема драстично да влијаат на домашните фирми, додавајќи дека вистинската слика зависи од тоа како Русија ќе реагира на мерките, јави дописникот на МИА од Прага.
Министерот се сретна со претставници на градежните домашни компании со цел да се најде решение за проширување на пазарот, поради губење на рускиот пазар во моментот.
Земјите на ЕУ одобрија нови економски санкции против Русија поради нејзиното однесување кон украинската криза, кои ќе се применуваат од денеска.
Санкциите се однесуваат на неколку области и тоа во врска со ограничувањето на пристапот на Русија кон пазарите на капитал на европските фирми. Граѓаните на ЕУ сега нема да можат да купуваат или продаваат руски акции и обврзници или други финансиски инструменти со рок на исплаќање повеќе од 90 дена, издавани од големи руски државни банки, банки за развој или други институции што ќе дејствуваат во нивен интерес.
Исто така, ќе биде воведено ембарго на увоз и извоз на оружје и производи кои се наведени во постоечките заеднички листи на ЕУ како воена опрема.
Одобрена е и забрана за извоз на стока и технологија за двојна употреба.