Австриската компанија за енергетски напитоци „Ред Бул“ остана највреден бренд во Австрија, се наведува во истражувањето на „Еуробенд“ за тековната година.
На второ место се наоѓа реномираната компанија за производство на прецизно сечен кристал и накит, „Сваровски“, а потоа следи концернот за игри на среќа „Новоматик“, кој забележа најголем раст.
Исто така, голем раст на вредноста забележа и трговскиот ланец „Шпар“, кој од минатогодишното седмо место се искачи на четвртото.
Вредноста на брендот „Ред Бул“ се проценува на 15.4 милијарди евра, додека на „Сваровски“ на 3.5 милијарди евра.
Третото место му припадна на „Новоматик“ со вредност во висина од 2.6 милијарди евра.
Вкупната вредност на десетте главни брендови во Австрија порасна за 0.2 проценти или на 34.6 милијарди евра.
