Кинезите повторно го имаат најбрзиот супер-компјутер на светот, но на оваа листа и натаму доминираат Американците.
Вчера беше објавена „Top 500“ листата на најбрзи супер-компјутери на светот, а како и минатата година, првото место го држат Кинезите со својот „Tianhe-2“. Овој компјутер е во сопственост на кинеската влада и се користи како „истражувачка и едукациона алатка“, а податоците се обработуваат со брзина од 33,86 петафлопс.
На „BBC“ потсетуваат дека поминаа само пет години кога „Roadrunner“ на „IBM“ ја мина границата од 1 петафлопс, меѓутоа, овој супер-компјутер минатата година беше изгасен поради прекумерната потрошувачка на енергија.
Листата „Тop 500“ супер-компјутери се објавува уште од 1993-та година и на неа се прикажува брзината на компјутерите темелена на „бенчмаркот“ кој за прв пат е користен во далечната 1979-та година, но тој, нормално со напредокот на технологијата, со години постојано се подобрува.
Инаку од минатата година бројот на кинески супер-компјутери на оваа листа се зголеми за дваесет проценти, додека уделот на американски супер-компјутери е намален за 15 отсто, но и покрај тоа САД и натаму доминира на оваа листа.
Така меѓу 500-те најмоќни компјутери на светот 233 се наоѓаат во Америка, 76 се во Кина (лани оваа бројка изнесуваше 63), 30 во Велика Бринатија, 27 во Франција и 23 во Германија.
Вкупната брзина на сите компјутери во „Top 500“ листата изнесува дури 274 петафлопс, при што брзина поголема од еден петафлопс имаат дури 37 компјутери.
