Во декларацијата усвоена денес на состанокот на Северноатлантскиот совет во Хаг, шефовите на држави и влади на членките на НАТО се согласија за распределба за одбрана во износ од пет проценти од бруто домашниот производ (БДП), имено 3,5 проценти од БДП годишно за расходи за одбрана до 2035 година и 1,5 проценти од БДП за поврзани трошоци.
Сојузниците се согласија, според текстот на декларацијата, да достават годишни планови со веродостојни патеки за таа цел, со напредок што ќе се разгледа во 2029 година.
Членките на НАТО, исто така, ги потврдија „своите трајни суверени обврски“ да обезбедат поддршка на Украина, чија безбедност придонесува за безбедноста на западниот сојуз, наведувајќи дека за таа цел ќе вклучат директни придонеси за одбраната на Украина и нејзината одбранбена индустрија при броењето на трошоците за одбрана на сојузниците.
Во декларацијата се наведува дека шефовите на држави и влади се собрале во Хаг за да ја потврдат својата посветеност кон НАТО и трансатлантските врски, како и својата цврста посветеност на колективната одбрана во согласност со член 5 од Вашингтонскиот договор дека „напад врз еден од нас е напад врз сите“.
„Остануваме обединети и непоколебливи во нашата решеност да ги заштитиме нашите милијарда граѓани, да ja браниме Алијансата и да ја заштитиме нашата слобода и демократија“, се вели во декларацијата.
Планираната инвестиција од пет проценти од БДП во основна одбрана и поврзана со одбраната и безбедноста треба да обезбеди исполнување на индивидуалните и колективните обврски на НАТО, се наведува во него.
Додадено е дека инвестициите треба да обезбедат НАТО да ги има силите, капацитетите, ресурсите, инфраструктурата, воената подготвеност и отпорноста потребни за одвраќање и одбрана, спречување и управување со кризи, како и заедничка безбедност.
Документот потврдува заедничка посветеност за брзо проширување на трансатлантската соработка во одбранбената индустрија и користење на новите технологии и иновации за унапредување на колективната безбедност.
„Ќе работиме на елиминирање на трговските бариери во одбранбениот сектор меѓу сојузниците и ќе ги искористиме нашите партнерства за промовирање на соработката во одбранбената индустрија“, се вели во декларацијата.
На крајот од документот, се изразува благодарност до домаќинот на состанокот, Холандија, и се најавува дека следниот ќе се одржи во 2026 година во Турција, а потоа во Албанија.
