Проектот на УСАИД за експанзија на мали бизниси во соработка со Центарот за развој на североисточниот плански регион денеска го одбележа почетокот на иницијатива за имплементација на Лидер пристапот за локален економски развој во североисточна Македонија.
Лидер пристапот е форма на јавно-приватно партнерство базиран на оформување локални акциски групи (ЛАГ-ови), здруженија кои се состојат од претставници на јавниот, граѓанскиот и приватниот сектор. Оваа нова иницијатива ќе работи на формирање два ЛАГ-а во североисточна Македонија кои ќе ги обединат трите сектори околу заеднички проблеми поврзани со локалниот економски развој и ќе им овозможат да развијат проекти за решавање на истите.
„Лидер пристапот ги кани поединците да учествуваат во стратешко носење одлуки и селекција на приоритети на кои треба да се работи во нивните области. Овој пристап гледа на локалните граѓани како на најдобри експерти за развој на нивнатa заедница“, рече Мајкл Стиватер, генерален канцелариски директор на УСАИД/Македонија.
Проектот на УСАИД за експанзија на мали бизниси во 2013 го воведе Лидер пристапот во Пелагонија и успешно формираше две локални акциски групи. Тие веќе работат на развивање и спроведување проекти за економски развој, вклучувајќи и студија која ќе им помогне на производителите на јаболка од Ресен да додадат вредност на нивното производство преку преработување на јаболките во јаболков сок или концентрат.