Карванот за наградната игра „Фискална во рака-награда без мака“ денеска почна од Куманово. Граѓаните масовно го посетија продажното место во центарот на градот, каде во наменските кутии ги оставаа ковертите со по дваесет фискални сметки за учество во наградната игра.
Кумановци веруваат дека и во наредното извлекување, кое ќе се оддржи на 30-ти јуни на МТВ ќе имаат можност да освојат една од главните награди, стан, деловен простор, автомобил. Во првото извлекување на наградната игра, еден од добитниците на главните награди беше 70-годишниот кумановец Трајко Кузмановски, кој освои стан во Скопје.
„Еден месец собирав фискални сметки од различни продавници, пред се од маркетите. Се надевам дека ќе освојам една од главните награди, а ако не се случи, тогаш посакувам да добијам бела техника“, изјави Јулијана Костадиновска.
Околу 30 коверти испрати Мица Крстевска, која и претходно учествувала во наградната игра.
„По моја проценка, пристигнаа над 4.000 коверти. Се наполнија две кутии, а до крајот на извлекувањето сигурно ќе има уште заинтересирани. Наградите се примамливи за кумановци“, изјави Благоја Цветковски, продажен менаџер на пунктот „Кеопс“.
Досега од наградната игра чиј организатор е Државната лотарија на Македонија под покровителство на Министерство за финансии, доделени се еден стан, еден деловен простор, пет автомобили и 750 вредносни ваучери.
Карванот за оваа наградна игра завршува на 29-ти јуни во Струга.
