Гувернерот на централната банка на Турција Ердем Басчи изјави дека на крајот на месецот најверојатно ќе дојде до уште едно мало намалување на клучните каматни стапки.
„Ќе ги намалиме стапките доколку и понатака сметаме дека инфлацијата ќе слабее, но тоа ќе го направиме многу претпазливо“, изјави Басчи, пренесува агенцијата Франс прес.
Централната банка минатиот месец намали една од клучните каматни стапки, но премиерот на Турција, Реџеп Таип Ердоган тој потег го карактеризираше како премногу слаб. Банката претходно агресивно ја зголеми каматната стапка во јануари, во обид да го запре остриот пад на лирата, која за два месеци изгуби речиси една третина од својата вредност.
Ердоган се плаши да не загуби едно од неговите клучни постигнувања: силниот економски раст кој Турција го бележи веќе 10 години.