Буџетот на Европската унија за идната 2015 година ќе изнесува 145 милијарди евра, јави дописникот на МИА од Брисел.
Според нацрт-буџетот што денеска го претстави Европската комисија, овие средства се дел од Повеќегодишната финансиска рамка на Унијата за периодот 2014 – 2020 година, која изнесува 960 милијарди евра.
Претсавувајќи го предлогот, еврокомесарот за буџет Јануш Левандовски истакна дека буџетот на Унијата за идната година е предвидено да помогне за економскиот раст во Европа и покрај финансиските ограничувања.
Според Левандовски, 145,6 милијарди евра во буџетот се предвидени за трошоци, од кои 142,1 милијарди евра во вид на плаќања, при што најголемиот дел од обврските е за идни проекти кои се предвидува да ја направат Европа економски посилна, додека 40 проценти се за покривање на проектите финансирани од ЕУ за финансискиот период 2007 – 2013 година.
Исто така, Комисијата предлага понатамошно намалување од еден отсто во нејзините персонални пресметки, што е трето вакво намалување во последните три години.
Буџетот на ЕУ е здружување на мал дел од ресурсите на 28-те земји-членки за што најголема корист ќе имаат повеќе од 500 милиони Европејци. Тој помага да се избегне двојното зголемување на напорите на национално ниво и секоја од земји-членки ја прави посилна во напорите да донесе подобри резултати отколку фрагментирана акција.
Нацрт-буџетот за 2015 година изнесува еден отсто од комбинација на Бруто-домашниот производ (БДП) на сите земји-членки и успева да ги земе предвид сегашните и идните главни прашања како што е украинската криза или потребата за зајакнување на енергетската безбедност на ЕУ со рефокусирање нејзините ограничени ресурси, истакна комесарот Левандовски.
Предложеното зголемување од 2,1 проценти во заложбите и 1,4 отсто во плаќањата е практично апсорпција од страна на проценетата стапка на инфлација за 2015 година.
Посветените средства се фокусираат на нови програми (2014-2020) и речиси 60 проценти од предложениот износ е посветен на програми кои поддржуваат програми како “Европа за истражување и иновации, млади и бизниси”.
Најголемиот дел од средствата ќе одат на области кои ќе го зајакнат економскиот раст во Европа и ќе донесат работни места (29,5 отсто повеќе во споредба со 2014 година), како што се проектите “Хоризонт 2020”, транс-европската мрежа за енергија, транспорт и Иницијативата за вработување на млади.
Други области во кои ќе се употребат дел од 145-те милијарди евра идната година се во плаќањата во однос на порастот на азилантите, миграцијата и фондот за интеграција и заштита на здравјето на Европејците и потрошувачите. Овој нацрт-буџет, исто така, вклучува намалување за еден процент на персоналот во ЕУ-институциите во следните три години, при што Комисијата ги намалува барањата за расходи и кадровско екипирање на другите институции на ЕУ за подобро да ги усогласат со намалување на персоналот за пет проценти во следните пет години и да се воздржуваат од други административни трошоци.
А, по овој предлог за нацрт-буџетот на ЕУ за 2015 година, направен од страна на Еврокомисијата, следува позиционирање и одлука на Европскиот совет (земјите-членки) во однос на истиот, а проследено со гласање и на Европскиот парламент, при што ако постои несогласување меѓу Советот и Европарламентот, предвиден е период од 21 ден за помирување.
