Каматните стапки во Италија денес продолжија да се намалуваат, што укажува на зајакнување на довербата во економијата на оваа земја.
Исто така, разликата меѓу стапката на италијанските десетгодишни обврзници и нивниот германски еквивалент продолжува да се намалува, паѓајќи на 136,5 поени на почетокот на неделното тргување.
Разликата меѓу приносите на италијанските и германските обврзници, кои се земаат како репер во еврозоната, претходно во петок беше намалена на 140 поени, пренесува италијанската агенција АНСА.
Разликата меѓу каматните стапки е важно мерило за довербата на инвеститорите во Италија, која на крајот на 2012 беше на работ на финансиската криза, а разликата меѓу приносот на обврзниците на Рим и Берлин надминуваше 500 поени, со каматни стапки над седум проценти.
Приносите на десетгодишните државни должнички хартии денес се намалија на 2,72 од 2,77 проценти, колку што изнесуваа во петокот.
