Централната банка на Турција ја намали референтната каматна стапка за прв пат во последната година, и покрај екстремно високата стапка на инфлација.
„Помалата неизвесност и позитивните индикатори во однос на премијата за ризик влијаеа на тоа да ја намалиме еднонеделната репо каматната стапка за 50 базични поени на 9,5 проценти“, се наведува во соопштението на банката, пренесува Ројтерс.
Со желба да се оддржи рекордно намалениот економски раст, турскиот премиер Реџеп Таип Ердоган, минатиот месец повика на намалување на каматните стапки, со образложение дека победата на неговата владеачка партија на локалните избори ја намалила политичката неизвесност во земјата и ја вратила довербата кај инвеститорите.
Турската валута лира утринава за момент падна на 2,1 долари, но подоцна се опорави на 2,09 долари.
Ердоган веќе долго време се противи на високите трошоци на задолжување, обвинувајќи ги странските инвеститори и шпекуланти за заговор во зголемувањето на каматните стапки на штета на економското здравје на Турција.
