ДОМ, по повод изминувањето на роковите за еколошко прилагодување на големите индустриски загадувачи, им изразува благодарност на сите компании кои успеаа во предвидениот рок да ги исполнат обврските и да добијат А интегрирана дозвола, а ги поттикнуваме оние кои сеуште ги немаат дозавршено обврските да го сторат тоа што поскоро во интерес на здравјето на граѓаните и подобрување на состојбите со животната средина.
,,Воедно изразуваме задоволство од спроведените политики на Владата и Министерството за животна средина за исполнување на еколошките стандарди, како и посветениот однос на Инспекторатот за животна средина за конечно разрешување на овој горчлив и опасен проблем со кој се соочуваа граѓаните на Македонија, кои живееа во близина на големите индустриски загадувачи”, се вели во соопштението.
ДОМ , како зелена партија, смета дека кон оние компании кои сеуште го немаат завршено процесот на еколошко прилагодување е постапено во согласност со законската регулатива и донесени се одлуки кои одат во насока на побрзо завршување на процесот и намалување на опасностите од загадувањето. Реални се и предвидените парични казни, бидејќи загадувањето носи финансиски импликации на здравјето на луѓето и на животната средина.
Од ДОМ бараат уплатените парични средства од компаниите кои не успеале во предвидениот рок 1 април 2014 да го завршат еколошкото прилагодување, да бидат наменети исклучиво за подобрување на состојбите со животната средина и подигање на нови зелени површини во близина на индустриските загадувачи.
,,Од ДОМ ова и претходно го баравме и само ќе потсетиме: подигање на паркови со заштитно зеленило околу фабриките, нови зелени површини во Парк шумата Гази Баба, како и нови парковски површини во општините кои најмногу го чувствуваат загадувањето, Гази Баба, Бутел, Аеродром, Центар, Тетово и Гостивар”, се вели во соопштението.