Производителот на смартфони „BlackBerry“ објави дека во минатата година оствариле загуба од дури 5.9 милијарди долари.
Канадскиот производител на телефони во последниот квартал од 2013-та година забележа загуба од 423 милиони долари, додека во третиот квартал загубата беше дури 4.4 милијарди долари.
Компанијата во 2012-та година забележа добивка од 98 милиони долари.
Од „BlackBerry“ соопштија дека се задоволни од работењето во последниот квартал од 2013-та година и дека тоа е знак за враќање на патеките на раст и профитабилност.
Канадската компанијата минатата година го претстави новиот оперативен систем „BlackBerry 10“, со надеж дека ќе вратат дел од уделот на пазарот, кој го загуби од ривалите, како што се „Apple“ и другите кои го користат системот на „Google“ – „Android“.
„BlackBerry“ во декември најави партнерство со тајванската компанија „Foxconn“, ја подобри организациската структура, укина 4.500 работни места или 40 проценти од вкупната работна снага, а сето тоа како дел од планот за реорганизација на работењето.
Компанијата „BlackBerry“ во еден момент од минатата година беше понудена и на продажба, но подоцна се откажаа од таа идеа и наместо тоа акционерите „вбризгаа“ финансиска инекција од милијарда долари.
