Банките од еврозоната ја повикаа Европската централна банка да го намали обемот на информации кои банките мора да и ги достават во рамките на прегледот на нивната состојба.
Имено, банките од еврозоната наведоа дека овие барања се преголеми.
Извршниот директор на Европската банкарска федерација (ЕБФ) Гвидо Равоет писмено и се обрати на ЕЦБ, барајќи од неа да го разгледа поедноставувањето на обрасците за проценка на квалитетот на средствата, наведувајќи дека дел од бараните податоци е бескорисен, пренесува агенцијата Блумберг.
„Постои загриженост околу премногу деталните прашалници и рокови кои делуваат неостварливо“, изјави директорот на ЕБФ.
ЕЦБ започна сеопфатна контрола над најголемите банки во еврозоната, во пресрет на преземањето на надзорот над банките во монетарниот блок во ноември.
Контролата вклучува проверка на адекватноста на капиталот во банките. ЕЦБ, наведе дека, во случај некои банки да не ги обезбедат бараните податоци, таа ќе изврши конзервативна проценка на капиталот, која може да вклучува и барања да се зголемат резервите за заштита од лоши кредити.
