Откупните претпријатија размислуваат да откупат помала количина од годинашната реколта тутун. Ова го предочиле на денешниот координативен состанок министерот за земјоделство, шумарство и водостопанство Љупчо Димовски, заменик министерот Зоран Коњановски, директорот на Државниот инспекторат за земјоделство Румен Стаменов и претставниците на Сојузот на здруженијата на тутунопроизводители.
Причина за евентуалното редуцирање на планираните количини за откуп, објасниле, е резултат на условите и пазарните поместувања.
Како што соопшти Министерството за земјоделство (МЗШВ), Димовски, Коњановски и Стаменов од откупувачите побарале да достават податоци за количините ориентален тутун од реколтата 2014 година што планираат да ги преземат. Побарале и да не се намалува бројот на кооперанти со кои ќе се склучуваат договори за откуп, но да се изврши корегирање на количините произведен тутун што беше прифатено од двете страни, и од производителите и од откупувачите, со цел стабилно производство во количини кои реално може да се откупат.
Откупните претпријатија на состанокот истакнале дека во моментот на склучување договори ќе внимаваат на правилната манипулација со тутунот и неговиот квалитет.
