Претседателот на Јужна Кореја Парк Геун-ху и канадскиот премиер Стивен Харпер денеска во Сеул го потпишаа договорот за слободна трговија меѓу двете држави. Ова е прв ваков договор меѓу Канада и некоја азиска држава.
Договорот е постигнат по повеќемесечни преговори, пропратени со отпор на канадската опозиција и дел од стопанствениците, кои стравуваа од преплавување на канадскиот пазар со евтини јужнокорејски производи, особено од автомобилската и електронската индустрија.
По Кина и Јапонија, Јужна Кореја е трет по големина канадски економски партнер од Азија, а седми во светски рамки.
Во 2012 година вкупната размена меѓу двете држави била околу 10 милијарди канадски долари, а јужнокорејанскиот извоз во Канада бил 6, 3 милијарди. Минатата година обемот на економска размена е речиси непроменет, но се очекува дека договорот за слободна трговија ќе придонесе за зголемување на трговијата меѓу двете земји за 20 до 30 посто во следните три години.