Додека сите погледи се свртени кон Женева, од „BMW“ одлучија да ги објават првите фотографии и спецификации на својот нов модел, „X4“.
Како што и се очекуваше, продукциската верзија е главно заснована на истоимениот концепт од 2013-та година.
Во однос на концептот, стилските промени ги опфатија предниот и задниот браник, ретровизорите и задните странични прозори.
„BMW X4“ e во суштина помала верзија на моделот „Х6“, а е поставен на платформата на моделот „BMW X3“ од кој е подолг за 14 mm и понизок за 36 mm.
Внатрешноста е дизајнирана исто така по примерот на „Х3“, со целосна употреба на украсни елементи од алуминиум.
„BMW“ не ја занемари ниту практичната страна на овој купе-кросовер. Задната клупа е делива во однос 40:20:40, па така деловите од седиштата можат поединечно да се навалуваат.
Кога се спуштени сите три дела, корисната зафатнина на багажникот се зголемува на 1400 литри.
Погледнете го промотивното видео за „BMW X4“:
Во понудата ќе бидат шест мотори, по три бензински и дизел агрегати.
Палетата на бензински мотори ја сочинуваат две 2.0-литарски „TwinPower Turbo“ четирцилиндарски единици со 184 ks (135 kW) и 270 Nm и со 245 ks (180 kW) и 350 Nm.
Покрај нив на купувачите на располагање ќе им биде и 3.0-литарски „TwinPower Turbo“ шестцилиндарски мотор со 306 ks (225 kW) и 400 Nm максимален вртежен момент.
Кога станува збор за дизелите, најслабиот е 2.0-литарски четирицилиндарски „TwinPower Turbo“ мотор кој развива 190 ks (140 kW) и 400 Nm.
Најмоќните дизел верзии во понудата им припаѓаат на шестцилиндарските 3.0-литарски „twin-turbo“ единици од 258 ks (190 kW) и 560 Nm и 313 ks (230 kW) и 630 Nm.
Се очекува „BMW X4“ да има светска премиера на саемот за автомобили во Њујорк во април месец, а производството ќе започне напролет.