Трговијата со кубански пури „е во добра кондиција“, со прометот од 447 милиони долари во 2013 година или зголемување за осум проценти, соопшти групацијата „Абанос“.
Ова зголемување ја покажува стабилноста и позитивните тенденции во трговијата со пури во светот и покрај мерките за ограничување на потрошувачката на тутунски производи, подвлече на прес-конференција Ана Лопес, директор за маркетинг на „Абанос“.
„Абанос“ годинава го прославува 20-годишното постоење.
Иако Европа и натаму останува најголемиот пазар за кубански пури, најголемиот раст на продажбата е регистриран во Кина, посочи потпретседателот на „Абанос“, Хавиер Торес Ерсиља.
Над 1.000 учесници од 60 земји пристигнаа во Хавана на 16-от меѓународен фестивал на кубанските пури, што според традицијата се оддржува во конгресната палата, јави ИТАР-ТАСС.
Годинава на фестивалот, што завршува на 28 февруари, ќе бидат претставени неколку нови производи на познатите марки „Ојо де Монтереј“ (Hoyo de Monterrey), „Партагас“ (Partagas), „Тринидад“ (Trinidad) и „Ејч Апман“ (H Upman).
