Новата странска инвестиција, британската „Ендава“ ИКТ компанија со седиште во Лондон, за развивање софтвери, во Република Македонија ќе отвори нови 450 работни места во наредните три до четири години, а во првата фаза ќе инвестира над два милиони евра.
Џон Которел, извршен директор на британската „Ендава“, по денешната средба со премиерот Никола Груевски изрази исклучителна благодарност до Владата и другите институции и ИТ компании во земјава за поддршката и нивниот голем интерес за проширување на овој бизнис во Република Македонија.
– Од 40 градови во Европа го избравме Скопје затоа што постои брз раст на ИТ секторот, забрзаниот економски раст и високообразованиот кадар, рече извршниот директор Которел, на заедничката прес – конференција со директорот на Агенцијата за странски инвестиции Висар Фида, додавајќи оти бил импресиониран од условите кои ги нуди нашата држава, а им биле презентирани и на средба со вицепремиерот Зоран Ставревски и директорот Фида.
Британската „Ендава“, која работи на развој на софтвери за најдобрите 500 мултинационални компании од листата на „ФОРТУНЕ“ од банкарскиот, телекомуникацискиот и осигурителниот сектор, отвора во првата фаза дистрибутивен центар за изработка на софтвери и во Скопје. Се планира, истакна директорот Фида, и раст на инвестициите, како и нови центри во други градови како што е Штип и Тетово, места каде што има ИТ факултети.
– Компанијата веќе почна со едуцирање на првиот тим на ИТ инженери, а во наредните месец до два ќе ја постигнат првичната бројка од 10 – 15 луѓе кои ќе можат да почнат на работат на производство на софтвер, појасни Фида.
Британската компанија „Ендава“ има свои канцеларии во Франкфурт, Њујорк, Атланта Галзгов, Оксфорд, Романија и Молдавија.
