Гувернерот на централната банка на Кипар, Паникос Деметријадис, очекува ограничувањата на трансферот и подигнувањето на пари од банките во земјата да бидат укинати до крајот на годината.
„Можеби не сите, но ограничувањата на движењето на капиталот на Кипар веројатно ќе бидат укинати во наредните неколку недели“, изјави Деметријадис, пренесува агенцијата АП.
Според неговите зборови, укинувањето на сите ограничувања ќе зависи од целосното враќање на довербата во банкарскиот систем на земјата, како и од владиниот напредок во спроведувањето на реформите наметнати во рамките на меѓународната програма за помош.
Овие ограничувања се воведени со цел да се спречи одливот на капитал од банките, откако Кипар во март минатата година доби пакет помош од меѓународните кредитори.
