Италијанската луксузна модна компанија „Prada“ во фискалната 2013-2014 година оствари раст на профитот од девет проценти, на 3,85 милијарди евра.
Растот на профитот е резултат, пред се, на продажбата во регионите на Азија и Пацификот и Северна Америка.
Извршниот директор на компанијата Патрицио Бертели наведува дека изминатата фискална година, која завршува во јануари, е четвртата последователна година во која „Prada“ бележи силен раст, пренесува агенцијата Франс прес.
Профитот во Азија и Северна Америка е зголемен за 11 проценти, а во Европа за пет проценти, што се смета за добар резултат, имајќи ги во предвид економските тешкотии.
Заработката на Блискиот Исток, исто така, е зголемена, достигнувајќи 90 милиони евра на ниво на цела година. Најслабите резултати, со раст на профитот од само еден процент, компанијата ги забележала во Јапонија, поради дефлација на јенот.