Германската авиокомпанија „Lufthansa“ го критикуваше планот на „Etihad“ од ОАЕ да го купи италијанскиот авиопревозник „Alitalia“ кој се наоѓа во криза.
„Ние сме против постојаното субвенционирање и делумната национализација на европските авиокомпании, без оглед дали ги купуваат европски земји или државни компании надвор од Европа“, се наведува во соопштението на „Lufthansa“ и се повикува Европската комисија да ги забрани таквите акции.
„Lufthansa“ не ги именуваше „Etihad“ и „Alitalia“, но ова соопштение е издадено еден ден откако „Etihad“ соопшти дека e во последната фаза на разгледување дали да го купи уделот во ослабениот италијански авиопревозник, пренесува агенцијата Франс прес.
„Etihad“ е национална авиокомпанија од Обединетите Арапски Емирати и бележи забрзан раст. Оваа компанија веќе купи одреден удел во неколку помали авиопревозници во целиот свет, односно удел од 29 проценти во „Air Berlin“, 40 проценти во „Air Seychelles“, 19,9 проценти во „Virgin Australia“ и три проценти во „Aer Lingus“.
