Најголемиот светски производител на мебел, шведската компанија „Ikea“, остварила рекорден нето профит од 3.3 милијарди евра.
Од податоците кои денеска ги објави компанијата, произлегува дека профитот за фискалната 2012-2013-та година завршена во август, е поголем за 3.1 процент на годишно ниво.
Вкупниот промет на „Ikea“ во минатата фискална година е зголемен за 3.2 проценти или на 28.5 милијарди евра. Најголеми пазари за компанијата се Германија, САД, Франција, Русија и Шведска.
Според планот за развој до 2020-та година вкупниот промет би требало да достигне 50 милијарди евра.
Од „Ikea“ исто така соопштија дека гледаат знаци на подобрување на многу пазари.
Евидентен е силниот раст во Кина, каде компанијата отворила две нови стоковни куќи, како и во Русија и во САД. Земјите од Јужна Европа исто така покажуваат позитивни знаци, иако продажбата на пазарите во Шпанија и Италија е многу намалена.
„Ikea“ моментално има 305 продавници во 26 земји и 135.000 вработени.