Земјоделскиот инспекторат денеска го укина решението за забрана за откуп на тутун во прилепскиот Тутунски комбинат со што на овој откупувач му дозволува од понеделник да го продолжи откупот на тутунот.
– Го укинуваме решението за забрана за откуп од 13 јануари зошто комбинатот покажа средства со кои може да откупува и да исплаќа тутун. Од понеделник продолжува откупот во тутунскиот комбинат, изјави Румен Стаменов, директор на Државниот земјоделски инспекторат.
Од комбинатот потврдуваат дека в понеделник го продолжуваат откупот и треба да се договорат на кои пунктови во населените места и со која динамика ќе се презема откупот.
Сигурно е дека ќе бидат отворени вратите на откупниот пункт во градот. Комбинатот во вторникот го официјализираше банкарскиот кредит од околу 3 милиони евра за да се дооткупи договорениот тутун. Застојот на откупот беше од почетокот на јануари.
Според генералниот директор Александар Дерменџиев, комбинатот остана без средствата среде откуп зашто ја зголеми динамиката, а просечната цена е 172 денари. Досега се откупени над 1.370 тони, а вкупно се договорени околу 3.000 тони тутун.
На ниво на земјава, според инспекторатот, од близу 30.000 тони колку што е проценета реколтата, досега се откупени 14.500 тони по просечна цена од 155 денари за килограм.
