Кинеската економија во 2013 година забележа најнизок раст во последните 14 години, но резултатот сепак е подобар од предвидувањата на кинеските власти.
БДП во четвртиот квартал од 2013 година се зголемил за 7,7 проценти, што во споредба со третиот квартал е пад од 0,1 проценти.
Како што пренесува Ројтерс, ова забавување на растот на втората според големина економија во светот се должи на падот на побарувачката и инвестициите на крајот на минатата година, кој би можел да продолжи и во 2014 година.
Пекинг и понатака се обидува да воспостави подобра рамнотежа меѓу внатрешната побарувачка и извозот, сметаат аналитичарите.
За цела 2013 година растот на кинеската економија изнесува 7,7 проценти, што е над целта која ја предвиде владата од 7,5 проценти.
Во соопштението на Заводот за статистика се наведува дека индустриското производство во декември е зголемено за 9,7 проценти во однос на истиот месец во 2012 година, што е малку помалку од предвидувањата на аналитичарите. Во ноември растот на индустриското производство изнесуваше 10 проценти на годишно ниво.
Вредноста на малопродажбата се зголеми за 13,6 проценти, што е во согласност со очекувањата, додека во претходниот месец растот изнесуваше 13,7 проценти.
Зголемувањето на инвестициите во фиксниот капитал, кој е еден од главните двигатели на растот на кинеската економија, во декември изнесуваше 19,6 проценти, наместо очекуваните 19,8 проценти.