Илјадници луѓе во целиот свет останаа без божикни подароци поради доцнење во големите американски курирски служби „ФедЕкс“ и „Ју-пи-ес“.
Компаниите го објаснија доцнењето во испораките со огромниот број порачки во он лајн продавниците, како и со лошите климатски услови во почетокот на седмицата во голем дел од територијата на САД.
„Ју-пи-ес“ вложува огромни напори да ги достави порачките што е можно побрзо.
Количеството на пратки што требаше да ги доставиме до Божик, ги надмина нашите логистички можности, поради што пратките доцнат, се вели во изјава на „Ју-пи-ес“.
Слично соопштение објави и „ФедЕкс“. Според претставници на „ФедЕкс“, од Денот на благодарноста, што се одбележува последниот четврток на ноември, до Божик службата обработила околу 275 милиони пратки.