Италијанската државна пошта ќе учествува во докапитализацијата на задолжената авиокомпанија „Alitalia“, пренесуваат медиумите од таа земја.
Одлуката за инвестирање на 75 милиони евра од вкупно 300 милиони евра планирани за спасување, беше донесена на состанокот на оваа државна компанија, пренесува агенцијата Франс прес.
Авиопревозникот „Alitalia“ е погоден од огромен долг, поради кој од неодамна започна со голем план за реорганизација на работењето, со намалување на буџетот за 300 милиони евра и отпуштање на 1,900 работници.
Преостанатите 225 милиони за докапитализација на „Alitalia“ веќе се обезбедени од инвеститорите во „Alitalia“ од приватниот сектор и банките.
Француско-холандската авиокомпанија „Air France KLM“, која досега беше главен акционер во „Alitalia“, со удел од 25 проценти, одби да даде свој придонес.
Под притисок на италијанската влада, планот за докапитализација на „Alitalia“ е договорен во октомври и ноември, меѓутоа, учеството на државната пошта многумина го критикуваа како потенцијална државна субвенција.
