Amazon ги менува цените на производите на својот сајт неверојатни 2,5 милиони пати дневно, покажува истражувањето на компанијата „Profitero“.
За споредба, големите трговски ланци „Walmart“ и „Best Buy“ ја корегираат цената на производите во своите продавници околу 50.000 пати, но на месечно ниво.
Иако е јасно дека компанијата на Џеф Безос, дел од својот голем успех го постигнува благодарение на честите попусти, широката понуда и конкурентните цени, честите промени не се изненадување, но аналитичарите истакнуваат дека овој податок е сосема неочекуван.
„Profitero“ објаснува дека до оваа вртоглава бројка е дојдено поради тоа што работењето на „Amazon“ во добра мера се ослонува на константен мониторинг на конкуренцијата и експресни реакции и намалување на цените во однос на ривалите.
Во последната година, очигледно е дека тактиката е доведена до совршенство, па бројот на промени на цените на дневно ниво е за десет пати зголемен, а освен физичките производи, „Amazon“ започна се почесто да ги менува и цените на своите услуги и на „виртуелната стока“.