Претседателот на САД, Доналд Трамп, ја предупреди Франција да го укине својот „данок на промет“ од 3% за технолошкиот сектор или ќе воведе 100% царина на увозот на американски вина и шампањ, пренесе „CNBC“.
Претседателот на САД ја упати заканата пред самитот на Г7 оваа недела во Евиан-ле-Бен, Франција.
„Го замолив (претседателот Емануел Макрон) да не ги оданочува американските компании, ако го сторат тоа, нема да имам друг избор освен да воведам 100% царина на целиот шампањ и вино што доаѓа од Франција“, изјави Трамп за публикацијата.
Данокот за дигитални услуги, одобрен од француските пратеници во 2019-та година, вклучува данок од 3% на бруто приходите генерирани во Франција од големите технолошки компании, вклучувајќи ги американските гиганти „Amazon“, „Meta“ и „Аlphabet“.
Извозот во САД сочинува околу една петтина од глобалната продажба на францускиот вински сектор, што вкупно изнесува 2 милијарди долари годишно.
Ова не е прв пат администрацијата на Трамп да ја таргетира француската винска индустрија со одмазднички мерки.
Во 2019-та година, САД изјавија дека би можеле да воведат високи тарифи за увоз на вино како одговор на тогаш новиот данок на дигитални услуги за кој Вашингтон вели дека дискриминира американски компании.
Во јануари оваа година, Трамп изјави дека ќе употреби тарифа од 200% за увоз на француско вино и шампањ за да го принуди Макрон да се придружи на неговата иницијатива на Мировниот совет.
Извозот на француско вино во САД се очекува да се намали за 15,9% во вредност во 2025-та година на 1,9 милијарди евра од 2,4 милијарди евра во 2024-та година, според Американската асоцијација на економисти за вино. Таа се повикува на податоци објавени од Генералниот директорат за царини и индиректни даноци, царинската служба на Франција. Во објава на „LinkedIn“, асоцијацијата изјави дека не е јасно дали падот се должи на тарифите или на пошироко поместување на клиентите кон поевтини вина.
Макрон, во меѓувреме, одби да го укине данокот на дигитални услуги во неговата земја, објави „Bloomberg“. Спорот би можел да ги затегне односите меѓу двајцата лидери на самитот на Г7 во Евиан.
„Дигиталните даноци, за кои голем број европски земји донесоа одлука и ги спроведуваат, се дел од нашето право. Не се Соединетите Американски Држави тие што одлучуваат кои се европски или француски закони, тоа е нормално и нема да биде ништо поинаку, барем додека сум јас тука“, изјави Макрон за телевизијата „TF1“ на самитот на Г7.
„Ќе имаме почитувачка, но цврста дискусија“, додаде Макрон.
