Агенцијата за кредитен рејтинг „Standard&Poor’s“ (S&P) ја потврди највисоката оценка на кредитниот рејтинг на Швајцарија „ААА+“ со стабилна прогноза.
Агенцијата во извештајот ја пофали Швајцарија дека успеала да се избори со многуте потенцијални макроекономски шокови, пренесува швајцарскиот весник „24 часа“.
„S&P“ во образложението наведе дека Швајцарија заслужува највисока оцена, помеѓу останатото, и поради стабилната политичка ситуација во земјата, високите перформанси во надворешната трговија, како и флексибилноста на буџетската и монетарната политика која придонесува за економската стабилност во услови на потенцијални надворешни шокови.
Бруто домашниот производ (БДП) по граѓанин во Швајцарија оваа година, според проценката на „S&P“, ќе достигне 80.000 долари, меѓу највисоките во светот.
„Швајцарската економија продолжува да извлекува позитивни ефекти од моментално поволната бизнис клима, висококвалификуваната продуктивна работна сила, како и ниската стапка на невработеност“, се додава во извештајот.
