Глобалната челична индустрија се соочува со растечка криза, бидејќи субвенционираното производство и прекумерниот капацитет продолжуваат да ги нарушуваат пазарите.
Организацијата за економска соработка и развој (ОЕЦД) вели дека производството на челик поддржано од државата, особено во Кина, врши сè поголем притисок врз производителите во Европа и другите економии на ОЕЦД.
Глобалниот капацитет за производство на челик продолжува да се шири и покрај слабата побарувачка што се заканува да ги намали цените и да ја наруши конкуренцијата, објавува „Euronews“, повикувајќи се на ОЕЦД.
Челикот е суштински материјал за широк спектар на индустрии, од градежништво и производство до електрични возила и центри за податоци.
ОЕЦД вели дека државните субвенции се главен двигател на глобалниот прекумерен капацитет, при што голем дел од зголемувањето на капацитетот за производство на челик во последните две децении се случува надвор од земјите на ОЕЦД, честопати со владина поддршка.
Според групата, во 2024-та година, просечниот кинески производител на челик добил субвенции 15 пати поголеми од оние дадени на компании во други земји, во однос на вкупната актива.
Во исто време, кинеските производители извезоа рекордни 131 милион тони челик во 2025-та година, што претставува зголемување од 153% во однос на обемот од 2020-та година и го надминува вкупното производство на челик на Европската Унија (ЕУ) во истата година.
Предупредувањето доаѓа во услови на очекувања од ОЕЦД дека глобалниот прекумерен капацитет за производство на челик ќе порасне од 640 милиони тони во 2025-та година на 745 милиони тони до 2028-ма година, бидејќи капацитетот продолжува да расте многу побрзо од побарувачката.
Се очекува Кина да игра голема улога во ова проширување, при што земјата планира да го зголеми својот капацитет за производство на челик на 38,6 милиони тони до 2028-ма година.
Доколку овие проекти продолжат, ОЕЦД вели дека глобалниот прекумерен капацитет ќе го надмине сегашното годишно производство на челик на сите земји на ОЕЦД за речиси 320 милиони тони, што го нагласува обемот на нерамнотежата со која се соочува индустријата.
Креаторите на политиките стравуваат дека овој прекумерен капацитет би можел да ја поткопа профитабилноста и долгорочната одржливост на локалните индустрии за челик, зголемувајќи ја зависноста од увоз на материјал кој се смета за стратешки важен за градежништвото, одбраната, енергетската инфраструктура и производството.
ОЕЦД, исто така, наоѓа докази дека некои извозници можеби ги заобиколуваат трговските бариери со испраќање полуготов челик во Југоисточна Азија за преработка пред повторно да го извезат на пазарите на ОЕЦД.
