Американските увозници треба да добијат околу 85 милијарди долари поврат на царини откако Врховниот суд на САД поништи дел од царинските мерки воведени во февруари од администрацијата на американскиот претседател Доналд Трамп. Според податоците од Царинската служба на САД, досега на компаниите им се вратени околу 20 милијарди долари, додека се очекува да бидат исплатени уште приближно 65 милијарди.
Врховниот суд пресуди дека Трамп ги пречекорил своите овластувања кога вовел широки царини, вклучувајќи основна стапка од 10 проценти за целиот увоз. Тоа беше прв пат за време на неговиот втор мандат највисокиот американски суд да поништи голема претседателска економска мерка. Голем дел од американската бизнис заедница ја поздрави одлуката на судот по месеци неизвесност и зголемување на трошоците, објавува Гардијан.
Бројни компании низ САД беа погодени од царините, од мали производители на виски во Кентаки до големи корпорации. Волмарт минатата година предупреди дека мора да ги зголеми цените на производите, додека производителот на бурбон Џим Бим објави привремено затворање на дестилерија поради проблеми предизвикани од трговските мерки и нестабилноста на пазарот.
Иако судот не нареди директно автоматско враќање на средствата, големите бизнис организации како што се Националната федерација за малопродажба и Трговската комора на САД побараа брзо враќање на вкупно 133 милијарди долари царини опфатени со пресудата. Многу големи компании, вклучувајќи ги „Волмарт“ и „Џенерал моторс“, веќе поднесоа барања за враќање на средствата, и покрај предупредувањата на Трамп дека ќе ги „запомни“ фирмите што бараат враќање на средствата.
Царините ги погодија и американските домаќинства. Според проценката на Даночната фондација, просечното американско семејство платило околу 1.000 долари дополнителни трошоци поради царините во 2025 година, а се очекува дека дополнителните трошоци ќе изнесуваат околу 700 долари оваа година. И покрај одлуката на Врховниот суд, Трамп се обиде да воведе нова универзална царина од 10 проценти користејќи различна правна основа, но Трговскиот суд на САД, исто така, ја блокираше таа мерка во мај.
