Неколку европски авиокомпании моментално подготвуваат кризни планови за летната сезона поради можен недостиг на керозин, објавува италијанскиот весник „Кориере дела Сера“. Причината, како што е наведено, е блокадата на увозот на авиогориво поврзано со ситуацијата во Иран, што може да доведе до промени во распоредот на летови и откажување на одредени летови.
Иако моменталните залихи се сè уште доволни, нискобуџетниот превозник „Рајанер“ веќе се подготвува за најлошото сценарио.
-Засега нема ништо конкретно, но бидејќи Ормутскиот теснец е сè уште затворен, проблемот со снабдувањето станува сè посериозен за нашиот сектор од недела во недела – изјави извршниот директор на „Рајанер“, Мајкл О’Лири, за „Кориере дела Сера“.
Според него, доколку испораките на керозин не продолжат до почетокот на јуни, може да има итни мерки, вклучително и откажување на одредени летови. Први на удар би биле домашните летови, додека приоритет би им се дал на утринските, доцните попладневни и вечерните летови, со цел да се олесни патувањето за деловните патници.
Комесарот за туризам на ЕУ, Апостолос Цицикостас, предупреди дека ситуацијата е сè уште „нестабилна и неизвесна“ и нагласи дека соработката меѓу земјите-членки е клучна за надминување на кризата.
-Керозинот стигнува до Европа за најмалку 40 дена – предупреди извршниот директор на Луфтханза, Карстен Шпор, за списанието Шпигел. Тој изјави дека снабдувањето на неговата компанија е обезбедено до средината на јуни, но дека по евентуалното повторно отворање на Ормутскиот теснец, сè уште ќе има значително доцнење во испораките.
Дополнително, Луфтханза побара од Европската комисија одредени регулаторни промени, вклучително и можноста за користење на алтернативно гориво за авиони од типот Џет-А наместо моментално дозволеното Џет-А1, што, велат тие, би го олеснило планирањето во услови на нарушен пазар.
