Кој ќе го вклучи алармот, намален извозот но и увозот во Македонија

Државниот завод за статистика ги пресмета дефинитивните податоци за 2024 година. Во нив се наведува дека трговската размена на Македонија со странство почнува да тоне. Податоците на статистичарите покажуваат дека вкупната вредност на извозот на стоки од Македонија во 2024 година изнесува 479 464.9 милиони денари и бележи пад од 6.45 % во однос на претходната година. Вредноста на увезената стока во 2024 година изнесува 683 900.3 милиони денари, што е за 0.42 % помалку во споредба со истиот период од претходната година.

Податоците на статистика покажуваат дџека трговската размена по производи според Стандардната меѓународна трговска класификација покажува дека во извозот најголемо е учеството на: катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и други катализатори на носачи.

Во увозот пак најмногу се застапени: нафтените масла и маслата добиени од битуменозни минерали, другите метали од платинската група и нивни легури, необработени или во облик на прав, платината и легурите на платина, необработени или во прав и други моторни возила за превоз на лица.

Извоз јануари – декември 2024 година во однос на јануари – декември 2023 година

• 479 464.9 милиони денари: -6.4%
• 7 791.8 милиони евра: -6.4 % 
• 8 436.8 милиони САД долари: -6.3% 

Увоз јануари – декември 2024 година во однос на јануари – декември 2023 година

• 683 900.3 милиони денари: -0.4%
• 11 114.3 милиони евра: -0.4 % 
• 12 025.7 милиони САД долари: -0.3 % 

Во 2024 година, според вкупниот обем на надворешнотрговската размена, најмногу се тргувало со Германија, Велика Британија, Грција, Србија и Кина, кои учествуваат со 48.3 % во вкупниот обем на размената. Земјите членки на Европската Унија учествуваат со 61.4 % во вкупната размена.

И.П