Сè поголем број истражувања сугерираат дека одредени видови храна, особено овошјето, може да имаат заштитен ефект и да помогнат во намалувањето на ризикот.
Ракот на дебелото црево е болест која сè повеќе ги погодува помладите луѓе, што е загрижувачко.
„Смртноста од рак на дебело црево кај луѓе под 50 години не само што се зголемува, туку сега е водечка причина за смрт од малигни заболувања во таа возрасна група“, предупредува гастроентерологот Лабелис Падиља. Иако точната причина за ова зголемување сè уште не е целосно разјаснета, експертите истакнуваат дека начинот на живот, исхраната и состојбата на цревниот микробиом играат клучна улога.
Сè поголем број истражувања сугерираат дека одредени видови храна, особено овошјето, може да имаат заштитен ефект и да помогнат во намалувањето на ризикот.
Лубеница
Редовната консумација на лубеница е поврзана со 26% помал ризик од колоректален карцином. Иако ликопенот најчесто се поврзува со доматите, овој моќен антиоксиданс се наоѓа и во лубеницата – и во форма што полесно се апсорбира од телото. Покрај тоа, богато е со витамин Ц и вода, што придонесува за хидратација и подобро функционирање на дигестивниот систем.
Јаболка
Јаболката се уште една храна што е поврзана со намален ризик – околу 25%. Причината лежи во влакната и флавоноидите, кои имаат антиоксидантни и антиинфламаторни ефекти. Растворливите влакна што ги хранат „добрите“ бактерии во цревата и помагаат во одржувањето на здрав микробиом се особено важни.
Киви
Консумацијата на киви е поврзана со 13% помал ризик. Ова овошје е богато со витамин Ц, влакна и ензими како актинидин, кои помагаат во варењето и ја балансираат цревната флора. Истражувањата покажаа дека две киви дневно можат да помогнат при запек, што е важно бидејќи побрзото поминување на храната низ дигестивниот тракт може да ја намали изложеноста на штетни супстанции.
Агруми
Портокалите, лимоните и грејпфрутот се поврзани со околу девет проценти помал ризик од рак на дебелото црево. Тие се богати со витамин Ц и флавоноиди, кои имаат силно антиоксидативно и антиинфламаторно дејство, а дополнително придонесуваат за зачувување на здравјето на цревната слузница.
Бобинки
Иако не се издвоени во сите анализи, бобинките како што се боровинките, малините и јагодите се препорачуваат поради нивната висока содржина на влакна и полифеноли. Овие супстанции се поврзани со намалување на воспалението и подобра заштита на клетките од оштетување.
Сепак, експертите нагласуваат дека ниедна храна не е „чудо“ сама по себе. Клучот е во разновидна и балансирана исхрана, богата со влакна, со што е можно помалку преработена храна.
„Важно е да не се фокусираме само на еден вид храна. Разновидноста во исхраната е клучна, особено кога зборуваме за здравјето на цревниот микробиом“, заклучуваат лекарите.
Со правилна исхрана, редовна физичка активност и превентивни прегледи, ризикот од оваа сè почеста болест може значително да се намали.
