„Cupra“ го претстави својот најмал електричен модел досега – новиот „Raval“, градски хечбек кој ќе пристигне на европскиот пазар во 2026-та година.
Новиот модел е директно насочен кон конкурентите како што се „Renault 5 E-Tech“, „Alpine A290“ и идниот „VW ID. Polo GTI“.
Со должина од нешто повеќе од четири метри, „Rava“l останува во сегментот Б, но носи спортски изглед, широка трага и понизок центар на гравитација, па на прв поглед изгледа како вистински мал хот-хечбек.
Купувачите ќе можат да избираат помеѓу неколку верзии. Основниот модел користи електричен мотор од 116 кѕ и батерија од 37 kWh, со домет до 300 км.
Помоќните верзии нудат 135 кѕ, додека моделот со поголема батерија од 52 kWh произведува 211 кѕ и овозможува опсег до 450 км.
На самиот врв од понудата е „Raval VZ“, кој развива 226 кѕ и забрзува до 100 км/ч за 6,8 секунди.
„Cupra“ ги таргетира возачите кои сакаат спортски изглед со оваа верзија, па моделот добива адаптивни амортизери, прогресивно управување и електронско диференцијално заклучување.
Внатрешноста го следи модерниот тренд со 10,25-инчна дигитална инструмент табла и 12,9-инчен централен екран, додека бројот на физички контроли е сведен на минимум.
Почетната цена во Европа треба да биде околу 26.000 евра, што му дава на „Raval“ сериозна шанса да стане еден од најинтересните електрични градски автомобили.
