Новиот евтин модел што го нуди компанијата од Купертино е опремен со чипсетот A19, кој го напојува и претходно најавениот „iPhone 17“. Чипсетот ќе служи како поддршка за пакетот алатки за вештачка интелигенција на „Apple“.
Потврдена е и цената, па „iPhone 17e“ чини 599 долари (исто како и минатогодишниот модел „iPhone 16e“).
Основната верзија на телефонот доаѓа со 256 GB простор за складирање, а „iPhone 17e“ ќе биде достапен и во нова розова боја.
Една од најважните новини што го красат „iPhone 17e“ е поддршката за полнење со „MagSafe“. Телефонот доби и мобилен модем C1X, за кој „Apple“ тврди дека е до двојно побрз од C1 што го има „iPhone 16e“.
Овогодинешниот прифатлив „iPhone“ исто така има заштита од Ceramic Shield 2 на неговиот 6,1-инчен Super Retina дисплеј, за кој „Apple“ вели дека нуди три пати подобра отпорност на гребење од претходната генерација, како и намален отсјај.
Останатите спецификации се слични на оние на „iPhone 16e“, вклучувајќи ја и Fusion камерата од 48MP што користи само еден хардверски сензор.
„Apple iPhone 17e“ ќе биде достапен за претходна нарачка почнувајќи од 4-ти март, а ќе се појави во продавниците на 11-ти март.
