Зголемување на проценките на хипотеките за кредит и забавување на кредитирањето ќе биде резултат на најновите измени на Законот за проценка кој е во изработка во Министерството за правда, забележуваат банкарите и апелираат да не се прифатат вакви измени и да се остави решението од претходната измена од 2010 година.
Објаснуваат дека сега граѓаните за проценка плаќаат еднократно, а кога би се усвоило вакво законско решение ќе плаќаат секоја година.
За стан од 60 метри квдратни сега проценката е еднократна од 2000 до 2.500 денари, а со предвидените измени тој износ ќе достигне до 150.000 денари, појаснија на денешната прес-конференција од Здружението на банкарство при Стопанската комора на Македонија.
– Банките нема да можат да ја вршат проценката со своите вработени, а крајната цена ќе ја платат потрошувачите, односно нашите клиенти. Просечните цени што ги имаат банките се далеку пониски, а услугата се врши многу побрзо, истакна претседателот на Здружението Ѓорѓи Јанчевски.
Реагираат зошто не се консултирани за измените како засегната страна и зошто се носат сега кога веќе еднаш во 2010 година на нивни забелешки иста ваква одреба е сменета. Посочуваат дека имаат свои проценители кои веќе се обучени според правилници кои ги барале измените донесени пред три години.
Целта е кога се прави закон тој да биде поефикаен од претходниот, истакнуваат од Здружението.
Допис со своите забелешки испратиле на 7-ми овој месец до Министерството за правда, Министерството за финансии и Народната банка на Република Македонија, но се уште немаат добиено одговор.
