Канада ќе ја зголеми својата поддршка за енергетскиот сектор на Украина преку соработка со индустријата за снабдување со опрема за нафта и гас по поволни услови и зголемување на инвестициите во обновлива енергија, изјавија за „Reuters“ два владини извори.
Русија напаѓа електрани, далноводи и гасни постројки како дел од нејзината целосна инвазија на Украина што започна во февруари 2022-ра година. Руските напади оваа недела врз украинската електрична инфраструктура убија три лица, а десетици илјади оставија без електрична енергија и греење.
Украина и Канада се согласија за стратешко енергетско партнерство на состанокот во Париз во средата, при што канадската влада изјави дека ќе соработува со индустријата за снабдување со опрема за нафтениот и гасниот сектор на Украина по повластени услови и ќе ги охрабри инвестициите во енергетската безбедност на Украина.
Канада, исто така, ќе ги информира локалните индустрии за можностите за инвестирање во украински проекти за обновлива енергија и рехабилитација на хидроелектрани, според објавениот договор.
„Ова не е само рехабилитација, туку модернизација под притисок“, изјави за новинарите канадскиот министер за енергетика Тим Хоџсон.
Проценки на ризик за спречување на хибридни закани
Двете страни ќе спроведат проценки на ризик и вежби за справување со хибридните закани за енергетската инфраструктура и зајакнување на комерцијалните односи во областа на снабдувањето со нуклеарно гориво.
Договорот, кој вклучува споделување технички совети за развој на инфраструктура за снабдување со гас од неруски извори во Украина, не е правно обврзувачки и планираните инвестиции ќе мора да ги следат компаниите.
Украина излегува од најстудената зима од руската инвазија во 2022-ра година. Руските воздушни напади предизвикаа прекини во електричната енергија, водата и греењето, бидејќи температурите паднаа на минус 20 степени Целзиусови, а домаќинствата и бизнисите што имаат електрична енергија се соочуваат со зголемување на сметките за енергија.
Минатиот месец, централната банка на Украина ја ревидираше својата прогноза за раст за оваа година на 1,8% од 2% поради енергетската криза. Министерот за енергетика минатата недела изјави дека побарувачката за електрична енергија е околу двојно поголема од капацитетот за снабдување.
