Јапонскиот автомобилски гигант „Toyota“ најави четири нови целосно електрични автомобили, со што јасно сигнализира проширување на својата ЕВ-стратегија, и покрај претходните резерви околу доминацијата на електричните возила.
Претседателот на компанијата, Акио Тојода, во изминатите години отворено изразуваше скептицизам кон брзата транзиција кон возила на батерии. Уште во 2024-та година тој изјави дека електричните автомобили би можеле да зафаќаат најмногу 30 проценти од пазарот, нагласувајќи дека одлуката за иднината на автомобилската индустрија треба да ја донесат купувачите, а не регулативите или политиката.
Од претпазлив пристап до проширување на понудата
„Toyota“ досега применуваше повеќеслојна стратегија за намалување на емисиите, ставајќи силен акцент на „plug-in“ хибриди, самополнечки хибриди и возила на водород. Понудата на целосно електрични модели беше ограничена, при што моделот „bZ4X“ и неколку комерцијални возила беа носители на батериската технологија.
Сега компанијата најавува нов бран електрични модели наменети првенствено за американскиот пазар, кој се смета за клучен тест за идниот раст. Одлуката доаѓа во период на неизвесност, откако американската администрација укина дел од даночните олеснувања за електрични возила и ревидираше некои политики поврзани со емисиите на стакленички гасови.
Нови модели за поагресивен настап
Меѓу најавените новитети е електричен „Highlander“ со седум седишта и премиум ентериер – модел што доаѓа во момент кога „Tesla“ го повлекува својот голем „Model X“. „Toyota“ веќе започна да прима депозити за помалиот „bZ SUV“, целосно електричниот „CH-R“ од средна класа, како и за посебна, поиздржлива караванска верзија наречена „bZ Woodland“.
Овие четири електрични модели ќе се приклучат на пошироката понуда хибридни и plug-in хибридни возила на „Toyota“, која опфаќа сè – од минивани и пикапи до популарни кросовери и „SUV“ модели.
Потпретседателот на „Toyota Motor North America“, Дејвид Крист, изјави дека компанијата е свесна оти продажбата на електрични возила опаднала по укинувањето на федералните субвенции, но верува дека „Toyota“ заслужува поголем удел на ЕВ-пазарот. Според него, токму новите четири модели треба да ѝ помогнат на компанијата да ја зацврсти својата позиција.
