Турција ја ангажираше консултантската фирма „Ernst & Young LLP“ да ја води приватизацијата на два клучни моста во Истанбул и серија автопати, според извори запознаени со планот.
Фирмата со седиште во Лондон ќе ја советува турската влада за продажба на правата за управување со Мостот на мачениците „15 јули“ и Мостот „Фатих Султан Мехмед“, кои ги поврзуваат европската и азиската страна на Истанбул, како и најмалку девет автопати со патарина.
Изворите зборуваа под услов на анонимност бидејќи деталите од договорот не се јавни, објави „Bloomberg“. Турција, исто така, ја назначи канадската фирма „BTY Group“ како технички советник и планира да започне формален тендер подоцна оваа година, според истите извори.
Не е прв обид
Обидот за приватизација од 2012-та година, кој вклучуваше два моста и околу 2.000 километри автопати, привлече добитна понуда од 5,7 милијарди долари во тоа време. Сепак, процесот пропадна откако Реџеп Таип Ердоган, тогашен премиер, рече дека продажбата за помалку од 7 милијарди долари би била „предавство“. Владата сега очекува понуди што ја надминуваат таа сума.
Според турскиот министер за транспорт, околу 430.000 возила дневно ги преминуваат двата моста, а стандардната патарина за патничко возило е 59 лири по правец, или околу 1,36 долари по тековни цени.
„Ernst & Young“, една од таканаречените „големи четири“ сметководствени и ревизорски фирми, претходно работела како советник за проекти поврзани со мостови, автопати и болници во Турција.
