„Google“ објави нови податоци за распространетоста на одредени верзии на „Android“, откривајќи колку уреди го користат најновиот „Android 16“.
Според „Google“, на 1-ви декември 2025-та година, „Android 16“ го користеле 7,5 проценти од сите активни уреди. „Google“ забележува дека вистинскиот удел денес е веројатно нешто поголем, со оглед на тоа што ажурирањата продолжија да пристигнуваат до корисниците по тој датум, но веројатно не е значајна разлика.
Во секој случај, ова е доста скромно во споредба со „Apple“ и нивното темпо на усвојување на „iOS“ верзиите, но важно е да се има предвид дека „Android“ е многу поотворен екосистем со многу повеќе уреди. Поради ова, издавањето ажурирања за „Android“ е многу посложен процес, на кој корисниците се повеќе или помалку навикнати.
Што се однесува до другите верзии на системот, „Android 15“ е најчест, држејќи 19,3 проценти од пазарот. По него следуваат „Android 14“ со 17,2 проценти и „Android 13“ со 13,9 проценти удел. „Android 16“ е само на седмото место, зад сè уште многу распространетите верзии како „Android 11“, „Android 12“ и „Android 10“.
