Американската економија порасна малку побрзо од првичните проценки во третиот квартал, соопшти американската влада, а воедно ги ревидираше и корпоративните профити нагоре.
Според ажурираните податоци од Бирото за економски анализи на Министерството за трговија на САД, бруто домашниот производ порасна со годишна стапка од 4,4 проценти, што е најбрзо темпо од третиот квартал од 2023 година. Економистите очекуваа проценката да остане непроменета на 4,3 проценти, додека растот во вториот квартал изнесуваше 3,8 проценти, објавува Ројтерс.
Малото подобрување на проценката за периодот јули-септември е резултат на подобри податоци за извозот и инвестициите од страна на компаниите. Во исто време, увозот, кој се одзема во пресметката на БДП, исто така беше ревидиран нагоре. Клучните двигатели на растот во третиот квартал беа потрошувачката на домаќинствата и помалиот трговски дефицит.
Личната потрошувачка, која сочинува повеќе од две третини од целата економска активност во САД, порасна со стапка од 3,5 проценти во третиот квартал. Сепак, индикаторот за домашна побарувачка без влијание на надворешната трговија, конечната продажба на приватни домашни купувачи, беше малку ревидиран надолу, на 2,9 проценти, од претходно проценетите 3,0 проценти.
Економистите проценуваат дека економската активност сè повеќе ја следи таканаречената „К-форма“, во кој домаќинствата со повисоки приходи и големите корпорации имаат најголем придонес кон растот. Како една од причините, тие ги наведуваат политиките на американскиот претседател Доналд Трамп, особено агресивните царини за увоз, кои доведоа до зголемување на цените.
Растот на берзата и сè уште високите цени на недвижностите го намалија инфлацискиот притисок врз побогатите домаќинства, додека пониските и средните класи се ограничени во нивната способност да ги променат своите навики за трошење. Слична е ситуацијата и во деловниот сектор, големите компании имаат доволно ресурси за да ги апсорбираат повисоките трошоци предизвикани од царинските давачки, додека малите бизниси се борат да преживеат, дополнително оптоварени со недостатокот на евтина работна сила поради построгата имиграциска политика.
