Извозот на Турција кон балканските земји се зголеми за 8,1% во 2025-та година во споредба со претходната година и достигна вредност од околу 21 милијарда евра, при што најголемиот обем на извоз оди во Романија, по што следат Бугарија и Грција, според податоците од Турската асоцијација на извозници, објави „Türkiye Today“.
Ова зголемување доаѓа во услови на зголемени протекционистички политики во глобалната трговија, што ја поттикнува Турција да ги зајакне своите економски врски со соседните региони и да ги диверзифицира своите извозни пазари, се вели во изданието.
Долгогодишните дипломатски и трговски односи со балканските земји, поддржани од програми на делегации на високо ниво и деловни состаноци, одиграа клучна улога во зголемувањето на трговијата, покажуваат податоците собрани од агенцијата Анадолу.
Извозот во балканскиот регион, кој ги вклучува Албанија, Босна и Херцеговина, Бугарија, Хрватска, Црна Гора, Косово, Македонија, Романија, Србија, Словенија и Грција, достигна околу 21 милијарда евра.
Романија е на прво место со вредност од околу 6,8 милијарди евра, по што следуваат Бугарија со 4 милијарди евра, Грција со 2,9 милијарди евра, Словенија со 2,7 милијарди евра и Србија со 1,7 милијарди евра.
Турција извезе стока во вредност од 760 милиони евра во Косово, 706 милиони евра во Албанија, 638 милиони евра во Босна и Херцеговина, 631 милион евра во Хрватска, 547 милиони евра во Македонија и 140 милиони евра во Црна Гора.
Меѓу балканските земји, Турција забележа најголемо зголемување на извозот во Словенија во споредба со претходната година – 597 милиони евра повеќе отколку во 2024-та година. Следат Романија, Бугарија, Србија, Грција и Косово. Извозот, исто така, се зголеми во Хрватска, Босна и Херцеговина, Македонија и Црна Гора, додека извозот во Албанија се намали за 85 милиони евра во истиот период.
Само извозот од Истанбул во регионот изнесуваше 8,7 милијарди евра во 2025-та година. Со вкупниот извоз на градот кој достигна 82 милијарди евра, балканските пазари учествуваа со 10,7 проценти од вкупниот извоз на Истанбул.
Индустрискиот сектор го предводеше извозот на Турција во балканскиот регион во 2025-та година, а автомобилската индустрија беше на прво место со 4,3 милијарди евра.
Подолу следат хемиските производи, железото и обоените метали, електрониката и електротехниката, како и мебелот, хартијата и шумските производи, покажуваат податоците.
