Во објава на неговата мрежа Truth Social, Трамп рече дека царините од 10% ќе стапат на сила на 1 февруари за Данска, Норвешка, Шведска, Франција, Германија, Велика Британија, Холандија и Финска, кои испратија свои војници на таа територија откако тој објави дека сака САД да го преземат Гренланд, пренесува Ројтерс.
Според него, тие царини ќе се зголемат на 25% од 1 јуни и ќе продолжат да важат сè додека не се постигне договор за купување на Гренланд, кој е данска автономна територија.
Трамп рече дека Данска, Норвешка, Шведска, Франција, Германија, Велика Британија, Холандија и Финска испратиле војници на Гренланд „од непознати причини“.
„Ова е многу опасна ситуација за безбедноста, сигурноста и опстанокот на нашата планета. Овие земји, кои ја играат оваа многу опасна игра, ја доведоа таа игра до ниво на ризик што не е одржливо. Затоа, императив е, за да се заштити глобалниот мир и безбедност, да се преземат силни мерки за брзо и без прашање да се стави крај на оваа потенцијално опасна ситуација“, рече Трамп.
Тој го повтори предупредувањето дека „Кина и Русија го сакаат Гренланд“ и додаде дека „Данска не може ништо да стори во врска со тоа“.
„Со години ја субвенциониравме Данска, и сите земји од Европската Унија, и други, со тоа што не им наплаќавме царини или каква било друга форма на компензација. Сега, по векови, време е Данска да возврати – светскиот мир е во прашање! Кина и Русија го сакаат Гренланд, а Данска не може ништо да стори во врска со тоа. Тие во моментов имаат две санки со кучиња како заштита, неодамна изјави Трамп. Само Соединетите Американски Држави, под претседателот Доналд Џ. Трамп, можат да играат во оваа игра, и тоа многу успешно“, рече Трамп.
Тој рече дека ова е причината зошто царините ќе бидат воведени на сите споменати земји.
„Овие тарифи ќе бидат доспеани и ќе бидат платени сè додека не се постигне договор за целосно купување на Гренланд. Соединетите Американски Држави се обидуваат да ја завршат оваа трансакција повеќе од 150 години. Многу претседатели се обидувале, и со добра причина, но Данска отсекогаш одбивала. Сега, поради „Златната купола“ и современите системи за оружје, и офанзивни и одбранбени, потребата за преземање (на Гренланд) е особено важна“, рече Трамп.
Според него, „стотици милијарди долари моментално се трошат за безбедносни програми поврзани со „Куполата“, вклучувајќи ја и можната заштита на Канада“, и дека „брилијантен, но исклучително сложен систем може да функционира со својот максимален потенцијал и ефикасност, поради агли, мерења и граници“, само ако Гренланд е вклучен во него.
„Соединетите Американски Држави се веднаш отворени за преговори со Данска и/или која било од овие земји кои толку многу ја ставија во опасност, и покрај сè што направивме за нив, вклучително и максимална заштита, толку многу децении“, заклучи Трамп.
