„Hyundai“ ја продолжува својата офанзива на пазарот на електрични автомобили и подготвува нов модел – „Ioniq 3“, компактен електричен хечбек кој ќе биде позициониран под моделите „Ioniq 5“ и „Ioniq 6“, и според димензиите и според цената.
Станува збор за глобален модел, кој нема да биде достапен на сите пазари. Така, на пример, „Ioniq 3“ нема да се нуди на американскиот пазар.
Умерен дизајн за поширока публика
„Ioniq 3“, најавен преку концептот „Concept Three“, носи помирен и подостапен дизајн во споредба со поголемите електрични модели на „Hyundai“.
Моделот ги задржува купе-пропорциите, препознатливите „пиксел“ LED дневни светла и чистите линии на каросеријата, а воедно нуди практични решенија како класични рачки на вратите и дискретен заден спојлер.
Задниот дел е обликуван со целосна LED светлосна лента и поделен заден прозорец, решение кое потсетува на „Toyota Prius“.
Дигитален кокпит со физички контроли
Внатрешноста на „Ioniq 3“ носи нова дигитална инструмент-табла и голем централен екран со системот „Pleos Connect“, базиран на „Android Automotive OS“.
Достапни ќе бидат гласовни команди, „Apple CarPlay Ultra“, амбиентално осветлување и напредни системи за асистенција при возење.
Како значаен плус, автомобилот ќе располага и со физички копчиња за управување со климата – решение кое сè уште го преферираат многу возачи.
Технички детали и досег
„Ioniq 3“ ќе користи поедноставена „E-GMP“ платформа со 400-волтна архитектура. Се очекува основна верзија со еден електромотор и погон на предните тркала, со моќност од 204 коњски сили, додека спортска „N“ варијанта би можела да пристигне подоцна.
Во понуда ќе има две батерии – од 58 kWh и 81,4 kWh, при што поголемата треба да обезбеди досег од околу 630 до 640 километри според „WLTP“ стандардот. Поддржани ќе бидат и функциите „V2L“ и „V2G“.
Конкуренција и лансирање
Меѓу главните конкуренти на „Ioniq 3“ се вбројуваат „Kia EV3“, „Kia EV4“, „VW ID.3“, „MG4“, „BYD Dolphin“ и „Peugeot e-308“.
Премиерата на моделот се очекува во следните шест месеци, додека глобалното лансирање е планирано за 2027-ма година. Производството ќе се одвива во Турција, што е и причината зошто моделот нема да се продава во САД.
За Европа и останатите пазари, „Hyundai Ioniq 3“ би можел да стане еден од најинтересните и најдостапни електрични автомобили во наредните години.
