Разликите меѓу жените и мажите не завршуваат кај начинот на комуникација, лидерството или секојдневните одлуки. Тие стануваат видливи и кога се зборува за пари, особено кога станува збор за инвестирање.
Иако целта е иста – сигурност, раст и подобра иднина – патот до таа цел често е различен. Не затоа што едните „знаат“, а другите „не знаат“, туку затоа што различно размислуваат, проценуваат ризик и носат одлуки.
„Кај мажите многу почесто гледаме импулсивност и самодоверба што знае да премине во преценување на сопственото знаење“, вели финансиски советник со долгогодишно искуство на пазарот на капитал.
Според него, мажите почесто влегуваат во инвестиции со повисок ризик, тргуваат почесто и имаат потреба постојано да „прават нешто“ со своето портфолио. Акции, криптовалути, краткорочни шпекулации – таму каде што има адреналин, таму обично има и машки потпис.
Жените, пак, пристапуваат поинаку. Побавно, повнимателно, со повеќе прашања.
„Женските инвеститори прво сакаат да разберат што купуваат, зошто го купуваат и што може да тргне наопаку“, објаснува аналитичарка.
Тие поретко прават ненадејни потези, поретко паничат и многу поретко продаваат во момент на пад. Не затоа што не ги чувствуваат загубите, туку затоа што гледаат подалеку од утрешниот наслов или денешната берзанска паника.
Истражувањата на глобалните пазари покажуваат дека жените, иако инвестираат помалку често од мажите, на долг рок остваруваат посолидни и постабилни приноси.
Причината е едноставна – дисциплина. Жените повеќе се држат до планот, почесто инвестираат долгорочно и имаат поголема толеранција кон времето како фактор.
„Тие не очекуваат брза добивка, туку континуиран раст“, вели еден менаџер, па додава дека токму тоа во многу случаи се покажало како победничка стратегија.
Мажите, од друга страна, имаат поголема склоност кон ризик и често веруваат дека можат да го „победат пазарот“.
Тоа знае да донесе брзи добивки, но и болни загуби.
„Проблемот не е ризикот, туку прекумерната самодоверба“, вели соговорник од инвестициски фонд. Кога пазарот оди нагоре, сè изгледа паметно. Кога ќе тргне надолу… тогаш доаѓа тишината.
Интересно е што жените поретко инвестираат сами, а почесто бараат совет, второ мислење, анализа. Некој би рекол – несигурност. Други – мудрост.
„Прашувањето не е слабост, туку алатка“, вели економистка која со години работи со мали инвеститори.
Таа додава дека токму таа навика ги штити жените од избрзани одлуки и од модни трендови кои денес се хит, а утре заборавени.
Но, не треба да се генерализира по секоја цена. Има жени кои инвестираат агресивно и мажи кои се исклучително конзервативни.
Сепак, трендовите постојат и не се случајни. Тие се резултат на воспитување, општествени очекувања и различен однос кон ризикот уште од најрана возраст.
Она што финансиските експерти се согласуваат е дека најдобриот пристап не е „машки“ или „женски“, туку избалансиран.
Малку храброст, малку трпение. Малку интуиција, малку бројки. Зашто парите не прашуваат кој ги вложува, туку како.
А тоа, на крајот, прави целата разлика… или барем поголемиот дел од неа.
Б.З.М.
