САД ќе ги зголемат тарифите за увоз на кинески полупроводници во јуни 2027-ма година по стапка што ќе се утврди најмалку еден месец однапред, според документ поднесен во Федералниот регистар во среда и цитиран од „CNBC“.
Но, во меѓувреме, почетната тарифна стапка за увоз на полупроводници од Кина ќе биде нула во текот на 18 месеци, според документот поднесен од Канцеларијата на трговскиот претставник на САД.
Како дел од истрагата започната пред една година, агенцијата откри дека Кина се занимава со нефер трговски практики во секторот.
„Со децении, Кина ја таргетираше полупроводничката индустрија во потрага по доминација и применуваше сè поагресивни и сеприсутни антипазарни политики и практики“, се вели во документот.
Одлуката за одложување на новите тарифи за најмалку 18 месеци сигнализира дека администрацијата на претседателот Доналд Трамп се стреми да ги смири трговските тензии меѓу САД и Кина.
Дополнителните тарифи би можеле да станат и адут за преговарање ако идните разговори не успеат.
Американскиот претседател Доналд Трамп и кинескиот претседател Си Џинпинг постигнаа примирје во нивната таканаречена трговска војна во октомври, како дел од договорот што вклучуваше намалување на некои американски тарифи и дозвола на Кина да извезува ретки метали.
Новиот датум 2027-ма година им дава јасност на американските компании, кои изјавија дека внимателно следат како американските тарифи би можеле да влијаат на нивниот бизнис или синџири на снабдување.
Тарифите се одвоени од другите тарифи што администрацијата на Трамп ги заканува за кинескиот увоз на чипови според Член 232 од американскиот закон.
