Институтот Ифо со седиште во Минхен значително ја намали својата прогноза за растот на германската економија во споредба со есенската проценка, според која земјата требаше да забрза закрепнување во периодот 2025–2027 година.
Во најновата прогноза, институтот очекува германската економија да порасне за само 0,1% во 2025-та година и за 0,8% во 2026-та година. За 2027-ма година, пак, се прогнозира раст од 1,1%. Ова претставува значајна корекција во однос на есенската прогноза, која предвидуваше раст од 0,2% за 2025-та, 1,3% за 2026-та и 1,6% за 2027-ма година.
Тимо Волмерсхаузер, раководител на одделот за прогнози во институтот, истакна дека германската економија „бавно и со високи трошоци се прилагодува на структурните промени“, при што бирократијата и стареечката инфраструктура го отежнуваат работењето на компаниите и стартапите.
Трговската политика на САД продолжува да влијае негативно врз растот, што според предвидувањата ќе ја намали економската експанзија за 0,3 процентни поени во 2025-та година и за 0,6 поени во 2026-та година. И покрај очекуваниот умерен глобален раст од просек 2,5% меѓу 2025-та и 2027-ма година, германската индустрија ќе продолжи да губи конкурентност.
Владините инвестиции во инфраструктура и одбрана, како и мерките за економска поддршка, се оценуваат како недоволни: тие ќе допринесат со 0,3 процентни поени раст во 2026-та година и 0,7 поени во 2027-ма година, но нема да бидат доволни за одржливо проширување на производствениот капацитет.
Ифо, исто така, ја ревидираше проценката за производствениот потенцијал, кој за 2027-ма година е за 0,7 процентни поени понизок од есенската прогноза. Причините се слабеењето на пазарот на трудот, пониските инвестиции и забавувањето на растот на продуктивноста во Германија.
Се очекува невработеноста да се зголеми за 161.000 лица, достигнувајќи 6,3% во 2025-та година, да се стабилизира во 2026-та и малку да се намали на 5,9% во 2027-ма година. Инфлацијата, пак, се предвидува да изнесува 2,2% во 2025-та и 2026-та година и 2,3% во 2027-ма година, поради повисоките цени на услугите и зголемените трошоци за работна сила, и покрај поевтината енергија.
